የደደቢቱ አሰልጣኝ ንጉሴ ደስታ 20 ሺህ ብርና ለ3 ወር ቡድኑን እንዳይመሩ ተቀጡ

አዲስ አበባ፣ የካቲት 5፣ 2010 (ኤፍ.ቢ.ሲ) የደደቢት እግር ኳስ ቡድን አሰልጣኝ ንጉሴ ደስታ የ20 ሺህ ብርና የ3 ወር ቅጣት ተላለፈባቸው።

በ13ኛው ሳምንት የኢትዮዽያ ፕሪሚየር ሊግ ደደቢት ጅማ አባጅፋርን አስተናግዶ 2-1 ከተረታበት ጨዋታ በኋላ ንጉሴ ደስታ በዕለቱ ዳኛ ላይ የሰነዘሩት አስተያየት ተከትሎ ነው የቅጣት ውሳኔው የተላለፈባቸው።

የኢትዮጵያ እግር ኳስ ፌዴሬሽን የዲሲፒሊን ኮሚቴ የዕለቱ የጨዋታ ኮሚሽነር ያቀረበውን ሪፖርት መነሻ በማድረግ ከመረመረ በኋላ ውሳኔውን ማሳለፉም ታውቋል።

በዚህም መሰረት የዲሲፒሊን ኮሚቴ በአሰልጣኝ ንጉሴ ደስታ ላይ የ20 ሺህ ብር የገንዘብ ቅጣት እና ለ3 ወር ያህል ቡድኑን እንዳይመሩ ከበድ ያለ ውሳኔ አሳልፏል።

ውሳኔውን ተከትሎ ደደቢት በ15ኛ ሳምንት ከመከላከያ ጋር ካለው ጨዋታ ጀምሮ ቡድናቸውን ሊመሩ እንደማይችሉ የታወቀ ሲሆን፥ በቀጣይ በሚኖሩ ጨዋታዎች በምክትል አሰልጣኞቹ ደብሮም ሀጎስ እና ጌቱ ተሾመ ቡድኑን የሚመሩ ይሆናል።

የደደቢት እግርኳስ ክለብ በውሳኔው ዙርያ ይግባኝ እንደሚጠይቅ የክለቡ ስራ አስኪያጅ አቶ ሚካኤል አምደ መስቀል አስታውቀዋል።

አሰልጣኝ ንጉሴ ደስታ በወቅቱ የሰጡት አስተያየት ትክክል እንዳልነበረ እና “በስሜት ሆኜ የተናገርኩት በመሆኑ በይፋ ይቅርታ እጠይቃለው” ማለታቸው ይታወቃል።

ምንጭ፦ www.soccerethiopia.net