ኢትዮጵያና ኖርዌይ በስደትና በስደተኞች አያያዝ ዙሪያ በጋራ ለመስራት ተስማሙ

አዲስ አበባ፣ ጥር 4፣ 2010 (ኤፍ.ቢ.ሲ) ኢትዮጵያና ኖርዌይ በስደትና በስደተኞች አያያዝ ዙሪያ የበለጠ ተቀራርበው በጋራ ለመስራት መስማማታቸው ተገለፀ።

የውጭ ጉዳይ ሚኒስትር ዲኤታ ወይዘሮ ሂሩት ዘመነ የኖርዌይን የስደተኞችና የውህደት ሚኒስትር ሲልቪ ሊስታውግን ትናንት በጽህፈት ቤታቸው ተቀብለው አነጋግረዋል።

eth_nor_j.jpg

ወይዘሮ ሂሩት በዚሁ ወቅት ፍልሰት የአለማችን አጀንዳ መሆኑን ገልፀው፤ ይህም በበርካታ ሀገራት ላይ ተጽእኖ እያሳደረ ነው ብለዋል።

ለዚህ መፍትሄውም የፍልሰት መንስኤዎችን መፍታት እንደሚገባና ለዚህም በተባበሩት መንግስታት፣ በአፍሪካ ህብረትና ሌሎች ተቋማት በኩል የተለያዩ አቅጣጫዎችን በመቅረጽ መንቀሳቀስ እንደሚገባ ተናግረዋል።

ኢትዮጵያ በአፍሪካ ስደተኞችን በመቀበል ግንባር ቀደም መሆኗን ገልጸው ይህን “ክፍት ካምፕ ፖሊሲን” በመከተል አርአያነት ያለው ተግባር እያከናወነች መሆኗን አስረድተዋል።

የስደተኞች መብት እንዳይጣስ፣ አስፈላጊ አቅርቦቶች እንዲሟሉ፣ የትምህርት እድል እንዲያገኙና በሃገሪቱ ኢንቨስትመንት የስራ እድል እንዲፈጠርላቸው ኢትዮጵያ እየሰራች መሆኗንም ገልጸዋል።

በህዳር ወር 2010 ዓ.ም የኖርዌይ ልዑል አልጋ ወራሹ ልዑል ሃኮን ማገኑስ በኢትዮጵያ ያደረጉት ጉብኝት የሃገራቱ ግንኙነት በተለያዩ ዘርፎች እየተጠናከረ ለመምጣቱ ማሳያ መሆኑን ገልጸው ይህንም ኢትዮጵያ በበጎ እንደምታየው ተናግረዋል።

በደቡብ ሱዳን የሰላም ድርድር ሂደት ኖርዌይ ላበረከተችው ገንቢ ሚናም ወይዘሮ ሂሩት ምስጋናቸውን አቅርበዋል።

የኖርዌይ የስደተኞችና የውህደት ሚኒስትር ሲልቪ ሊስታውግን በበኩላቸው ኢትዮጵያ ስደተኞችን በመቀበልና ህገ ወጥ ስደትን ለመግታት የምታደርገውን ጥረት አድንቀዋል።

ሀገራቸው በስደተኞችና በስደተኞች አያያዝ ዙሪያ ከኢትዮጵያና ሌሎች የአውሮፓ ሃገራት ጋር ተባብራ ለመስራት ዝግጁ መሆኗንም አስረድተዋል።

በተለይም ህገ ወጥ የሰዎች ዝውውር ደላሎችን ለመቆጣጠርና ወደ ፍትህ ለማቅረብ የጋራ ጥረት እንደሚሻ ሚኒስትሯ መናገራቸውን ከውጭ ጉዳይ ሚኒስቴር ቃል አቀባይ ጽህፈት ቤት ያገኘነው መረጃ ያመለክታል።