አቶ በቀለ ገርባን ጨምሮ ሰባት ተጠርጣሪዎች ከእስር ተለቀቁ

አዲስ አበባ፣ የካቲት 6፣ 2010 (ኤፍ.ቢ.ሲ) አቶ በቀለ ገርባን ጨምሮ ሰባት ተጠርጣሪዎች በዛሬው እለት ከእስር ተለቀዋል።

የኢህአዴግ ስራ አስፈፃሚ ኮሚቴ በወሰነው መሰረት በተከታታይ በሁከትና ብጥብጥ፣ በሽብር እንዲሁም በሀይማኖት አክራሪነት ክስ የተመሰረተባቸው እና ቅጣት የተወሰነባቸው ግለሰቦች ላይ ክስ የማቋረጥ እና ይቅርታ የማድረግ ተግባር ሲከናወን መቆየቱ ይታወቃል።

ፋና ብሮድካስቲንግ ኮርፖሬት ባገኘው መረጃ መሰረትም አቶ በቀለ ገርባ፣ ጉርሜሳ አያና፣ አዲሱ ቡላላ፣ ደጀኔ ጣፋ፣ ጌቱ ጋሩማ፣ ተስፋዬ ሊበን እና በየነ ሩዳ በዛሬው እለት ከእስር መለቀቃቸውን አረጋግጧል።

የፌደራል ጠቅላይ አቃቤ ህግ በትናንትናው እለት ለፋና ብሮድካስቲንግ ኮርፖሬት እንደገለፀው፥ በሀገሪቱ ተከስቶ በነበረው ሁከትና ብጥብጥ ክስ ተመስርቶባቸው የነበሩ ግለሰቦች ክስ እንዲቋረጥ መንግስት መወሰኑ ይታወሳል።

ነገር ግን ተጠርጣሪዎቹ ችሎት ፊት ቀርበው ጉዳያቸውን በሚከታተሉበት ጊዜ ባሳይዋቸው ችሎት የመድፈር እና ህግ የመጣስ ተግባራት ምክንያት ጉዳዩን የሚመለከተው ፍርድ ቤት በእያንዳንዳቸው የአንድ ዓመት እና የስድስት ወር ቅጣት መበየኑ ይታወቃል።

ጠቅላይ አቃቤ ህግ በዚህ ምክንያት ጉዳያቸው በፌደራል የይቅርታ ቦርድ እንዲታይ የተወሰነ መሆኑን እና ጉዳዩም ለሀገሪቱ ርእሰ ብሄር ቀርቦ ሲፀድቅ ወደ ህብረተሰቡ እንደሚቀላቀሉ ማስታወቁ ይታወሳል።

ትናንት በተገለፀው መሰረት ተገቢው ሂደት ታልፎ አቶ በቀለ ገርባን ጨምሮ የሰባት ተጠርጣሪዎች በዛሬው እለት ከእስር ተለቀዋል።