Fana: At a Speed of Life!

ህፃናት ከመተኛታቸው በፊት ብርሃን የበዛባቸው ስክሪኖችን እንዲጠቀሙ መፍቀድ ለእንቅልፍ መዛባት ይዳርጋቸዋል-ጥናት

አዲስ አበባ፣ መስከረም 5፣ 2012 (ኤፍ ቢ ሲ) ህፃናት ከመተኛታቸው በፊት ብርሃን የበዛባቸው ስክሪኖችን እንዲመለከቱ መፍቀድ ለእንቅልፍ መዛባት በሽታ የሚዳርጋቸው መሆኑን አንድ ጥናት አመላክቷል ።

የትራክያ ዩኒቨርሲቲ ህክምና ዶክተሮች ያካሄዱት ጥናት እንዳመላከተው ፥ ህፃናት ከመተኛታቸው በፊት ብርሃን የበዛባቸው የተለያዩ የኤሌክትሮኒክስ መሳሪያዎችን እንዲጠቀሙ መፍቀድ በቀላሉ እንቅልፋቸውን እንዲተኙ አያደርግም።

በተለይም ህፃናት ለመተኛት ወደ አልጋቸው ከመሄዳቸው በፊት ብርሃን የበዛባቸው የሞባይል ስልኮችን፣ቴሌቪዥን እና ታብሌቶችን እንዲጠቀሙ መፍቀድ ለእንቅልፍ መዛባት ከመዳረጉ ባለፈ  በጤናቸው ላይ አሉታዊ ተፅዕኖ የሚያሳድር መሆኑ ተመላክቷል።

ይህም ህፃናቱ በቂ እረፍት እንዳያገኙ በማድረግ በጥዋት ተነስተው ትምህርት ቤት እንዳይሄዱ እክል የሚፈጥር መሆኑ በዘገባው ተጠቁሟል።

ስለሆነም ህፃናት ከመተኛታቸው በፊት ብርሃን የበዛባቸው የኤሌክተሮኒክስ መሳሪያዎችን ከመጠቀም እንዲቆጠቡ ማድረግ አስፈላጊ መሆኑ በጥናቱ ተመላክቷል።

በአንፃሩ ህፃናት ከመተኛታቸው በፊት የተለያዩ  ስፖርታዊ እንቅስቃሴዎችን እንዲሰሩ ማበረታታት፣ እራታቸውን ቀድመው እንዲመገቡ እና ወተት እንዲጠጡ ማድረግ  ስዓቱን የጠበቀና ጤናማ እንቅልፍ እንዲተኙ የሚያስችል መሆኑ ተገልጿል።

ምንጭ፦አናዶሉ

You might also like

Leave A Reply

Your email address will not be published.