Fana: At a Speed of Life!

በ2030 በመጠን በላይ ውፍረት የሚጠቁ ህፃናት ቁጥር ከ250 ሚሊየን በላይ ሊደርስ ይችላል

አዲስ አበባ፣መስከረም 23፣ 2011 (ኤፍ ቢ ሲ) እንደ አውሮፓውያን አቆጣጠር በ2030 ላይ በዓለም ተገቢ ባልሆነ ውፍረት የሚጠቁ ህፃናት ቁጥር ከ250 ሚሊየን በላይ ሊያሻቅብ እንደሚችል አንድ ጥናት አመላክቷል።

የብሪታንያ የልብ ህክምና ፋውንዴሽን ይፋ ያደረገው ሪፖርት እንዳመላከተው በዓለም አቀፍ ደረጃ በህፃናት ላይ የሚስተዋለው ተገቢ ያልሆነ ውፍረት ከምንጊዜውም በላይ አሳሳቢ ደረጃ ላይ ደርሷል።

በአሁኑ ወቅት በዓለም 158 ሚሊየን የሚሆኑ ህፃናት በበሽታው የተጠቁ ሲሆን፥ 191 የሚሆኑ ሀገራትም ሁኔታው በስፋት ይስተዋልባቸዋል።

በሽታው በተለይም በአፍሪካ፣ በእስያ፣ እና ላቲን አሜሪካ በሚገኙ ሀገራት ላይ በከፍተኛ ሁኔታ እየተስተዋለ መሆኑ በሪፖርቱ ተመላክቷል።

ይህም በሀገራቱ የመጣውን የአኗኗር ዘዴ መሻሻል ተከትሎ በተፈጠረ የዘፈቀደ አመጋገብ ስርዓት ምክንያት መሆኑ ነው የተገለጸው።

ይህ ተገቢ ያልሆነ የአመጋገብ ስርዓት በዚሁ የሚቀጥል ከሆነም በሚቀጥሉት አስርት ዓመታት ውስጥ በዓለም ደረጃ በበሽታው የሚጠቁ ህፃናት ቁጥር ከ250 ሚሊየን በላይ ሊያሻቅብ እንደሚችል ሪፖርቱ አስጠንቅቋል።

ከዚህ ባለፈም በሽታው ለስኳር በሽታ፣ለደም ግፊት፣ለልብ ህመም እና ተያያዥ በሽታዎች የሚያጋልጥ በመሆኑ በቀጣዩ ሀገር ተረካቢ ትውልድ ላይ  ከፍተኛ ጉዳት የሚያደርስ መሆኑ ተመላክቷል።

ምንጭ፦ሲ ኤን ኤን

You might also like

Leave A Reply

Your email address will not be published.