Fana: At a Speed of Life!

ቻይና ሶስት አዳዲስ ሳተላይቶችን ወደ ህዋ አመጠቀች

አዲስ አበባ፣ መስከረም 5፣ 2012 (ኤፍ ቢ ሲ) ቻይና ሶስት አዳዲስ ሳተላይቶችን ወደ ህዋ ማምጠቋን አስታውቃለች ።

ቻይና በሳለፈነው ሀሙስ ዕለት ሶስት የተለያዩ ሳተላይቶች ወደ ህዋ ማምጠቋን የሀገሪቱ የህዋ ሳይንስ ቴክኖሎጂ ተቋም አስታውቋል።

ሳተላይቶቹ ወደ ህዋ የተላኩትም በሰሜን ቻይና ሻንሺ ግዛት ታይዋን ተብሎ በሚጠራው  የሳተላይት ማዕከል ላይ መሆኑ ነው የተገለጸው።

ከሶስቱ ሳተላይቶች ውስጥ አንዱ ዜድ-1 02ዲ የሚል ስያሜ የተሰጠው ሲሆን፥ በቻይና የጠፈር ቴክኖሎጂ ምርምር ማዕከል የተዘጋጀ መሆኑ ተጠቁሟል።

ይህም የተፈጥሮ ሃብቶችን አያያዝ፣ የአካባቢን ሥነ-ምህዳራዊ ቁጥጥር፣ ድንገተኛ የተፈጥሮ አደጋንና የአየር ንብረት ብክለትን  ለመከላከል እና መቆጣጠር የሚያስችሉና መሰል መረጃወችን የሚሰበስብ መሆኑ ተገልጿል።

ሳተላይቱ ተልዕኮውን ለማሳካትም አምስት ዓመታትን በህዋ ላይ የሚያሳልፍ ሲሆን፥ከሌሎች ሳተላይቶች ጋር በኔትወርክ የሚገኛኝ መሆኑም ተመላክቷል።

ከዚህ ባለፈም ሳተላይቱ የተለያዩ ሰፋፊ ከተማዎችን በቀላሉ ለመቃኘት የሚያስችል እና እስከ 115 ኪሎ ሜትር ድረስ መረጃ መያዝ የሚችል ዘመናዊ ካሜራ የተገጠመለት ነው።

ይህም የሚገኙትን መረጃዎን በተከታታይ በተለያዩ ቀለሞች ለማዕከሉ ሪፖርት ለማድረግ ያስችለዋል ነው የተባለው።

በተመሳሳይ ወደ ህዋ ከተላኩት አነስተኛ ሳተላይቶች ውስጥ አንዱ ቢ ኤን ዩ-1 የተሰኘ ሲሆን ፥የተዘጋጀውም በቤጂንግ ዩኒቨርሲቲ አማካይነት መሆኑ ተገልጿል።

ሌላኛው ስሙ ያልተገለጸው አነስተኛ ሳተላይት  ደግሞ ሻንጋይ በሚገኝ የግል ቴክኖሎጂ ኩባንያ የተዘጋጀ ነው ተብሏል።

እነዚህ ወደ ህዋ የተላኩ ሁለት አነስተኛ ሳተላይቶችም ለአንድ ዓመት ያህል በህዋ ቅኝት የሚያደርጉ መሆኑ በዘገባው ተመላክቷል።

ምንጭ ፦ሲ ጂ ቲ ኤን

You might also like

Leave A Reply

Your email address will not be published.