Fana: At a Speed of Life!

የህዝብ ተወካዮች ምክር ቤት የ2012 የስራ ዘመን ዛሬ ይጀመራል

አዲስ አበባ፣ መስከረም 26፣ 2012(ኤፍ ቢ ሲ) የህዝብ ተወካዮች እና የፌዴሬሽን ምክር ቤቶች 5ኛ ዙር 5ኛ ዓመት የሥራ ዘመን የመክፈቻ ስነ-ስርዓት ዛሬ መስከረም 26 ቀን 2012 ዓ.ም በይፋ ይካሄዳል።

በስነ-ስርዓቱ ላይ የኢፌዴሪ ፕሬዚዳንት ሳህለወርቅ ዘውዴ የምክር ቤቶቹን መከፈት ካበሰሩ በኋላ የመንግስትን የበጀት ዓመቱ የትኩረት አቅጣጫ የሚያመላክት ንግግር እንደሚያደርጉ ታውቋል።

የህዝብ ተወካዮች ምክር ቤት የጽህፈት ቤት ሃላፊ ዶክተር ምስራቅ መኮንን እንደገለጹት፥ በመክፈቻ ስነ-ስርዓቱ ከምክር ቤቶቹ አባላት በተጨማሪ የዲፕሎማቲክ ማህበረሰቡ እና ሌሎች እንግዶች በስነ ስርዓቱ ይታደማሉ ተብሎ ይጠበቃል።

ከመክፈቻ ስነ-ስርዓቱ በመቀጠል ሁለቱ ምክር ቤቶች 5ኛ ዙር 5ኛ ዓመት የሥራ ዘመን አንደኛ የጋራ መደበኛ ስብሰባቸውን እንደሚያካሂዱ ኢዜአ ዘግቧል።

የህዝብ ተወካዮች ምክር ቤት በስራ ዘመኑ ከመደበኛ ስብሰባዎች በተጨማሪ የቋሚ ኮሜቴዎችና ሌሎች የምክር ቤቱን እንቅስቃሴዎች በመገናኛ ዘዴዎች በቀጥታ በማስተላለፍ ግልፅነትና ተጠያቂነት ያለው አሠራር ለማስፈን እንደሚሰራ መግለጹ ይታወሳል።

ምክር ቤቱ በስራ ዘመኑ ጥራትን፣ ተናባቢነትና ተፈፃሚነትን በማረጋገጥ ሀገራዊ ለውጡን ሊደግፉ የሚችሉ የህግ ማዕቀፎችን በማዘጋጀት የሀገሪቱን ሁለንተናዊ እድገት ለማፋጠን እንደሚሳራም ይጠበቃል።

ምክር ቤቱ በ2011 ዓ.ም በዋና ኦዲተር ከቀረበለት የሪፖርት ግኝት በመነሳትም የተጓደሉ አሠራሮችን ፈተሾ በማስተካከልና የሃብት አስተዳደር ሥርዓት በመዘርጋት የሀገሪቱን ሃብት በአግባቡ ጥቅም ላይ መዋሉን ማረጋገጥ ላይ ያተኩራል።

በሥራ ዘመኑ ሀገራዊ ምርጫና የህዝብና ቤቶች ቆጠራ በተሣካ ሁኔታ እንዲከናወን የፀደቁ አዋጆችን ከባለድርሻ አካላት ጋር በመሆን ተፈፃሚነታቸውን እንደሚከታተልም ተገልጿል።

You might also like

Leave A Reply

Your email address will not be published.