Fana: At a Speed of Life!

የሸለብታ ጊዜ የልብ ህመም ተጋላጭነትን እና በጭንቅላት ውስጥ የደም መፍሰስ አጋጣሚን በእጥፍ ይቀንሳል – ጥናት

አዲስ አበባ ፣ ጳጉሜን 5 ፣ 2011 (ኤፍ ቢ ሲ) ከሰዓት በኋላ ባለው ጊዜ ለአጭር ሰዓት የሚደረግ ሸለብታ (ናፕ) ለጤና በርካታ ጠቀሜታዎች እንዳሉት ይነገራል።

በስዊዘርላንድ ሉዛን ዩኒቨርሲቲ የተደረገ ጥናት ደግሞ የከሰዓት በኋላ ሸለብታ የልብ ህመም እና በጭንቅላት ውስጥ የደም መፍሰስ ተጠቂነትን በእጥፍ እንደሚቀንስ ያመላክታል።

እንደተመራማሪዎቹ ገለጻ በሳምንት አንድ ወይም ሁለት ጊዜ ከሰዓት በኋላ የሸለብታ ጊዜ የሚጠቀሙ ሰዎች ከማይጠቀሙት ይልቅ ለልብ ህመምና በጭንቅላት ውስጥ ለደም መፍሰስ አጋጣሚ የመጋለጥ እድላቸው በ50 በመቶ ይቀንሳል።

ተመራማሪዎቹ እድሜያቸው ከ35 እስከ 75 የሆኑ 3 ሺህ 400 ሰዎች ላይ ለአምስት አመታት ጥናቱን አድርገዋል።

በጥናታቸውም በሳምንት 1 ወይም 2 ጊዜ የሚኖር የሸለብታ ጊዜ ሰዎች በማታው ጊዜ ያጡትን ትክክለኛ የእንቅልፍ ሰዓት (ጣፋጭ የእንቅልፍ ጊዜ) ማካካስ እንደሚችልና ለጤና ጠቃሚ መሆኑን ገልጸዋል።

ተመራማሪዎቹ ከተጠቀሰው ጊዜ ውጭ ማለትም በሳምንት ከሁለት ጊዜ በላይ የሚኖር የሸለብታ ጊዜ ለልብ ጤንነት ፋይዳ እንደሌለውም አስረድተዋል።

በተቃራኒው ደግሞ የእንቅልፍ እጦት ለደም መርጋት እና ለደም ቱቦ መጥበብ ምክንያት ይሆናል ነው ያሉት።

ይህ አይነቱ ችግርም በሂደት ለመተንፈሻ አካላት በሽታ የመጋለጥ እድልን ከፍ ያደርገዋልም ብለዋል ተመራማሪዎቹ።

 

 

 

ምንጭ፦ ደይሊ ሜይል

You might also like

Leave A Reply

Your email address will not be published.